Luke 4
អារក្សសាតាំងល្បួងព្រះយេស៊ូ
1ពេលនោះព្រះយេស៊ូពេញដោយព្រះវិញ្ញាណបរិសុទ្ធក៏ត្រលប់ពីអូរយ័រដាន់មកវិញហើយព្រះវិញ្ញាណបាននាំព្រះអង្គទៅឯទីរហោឋាន 2ដើម្បីឲ្យអារក្សសាតាំងល្បួងសែសិបថ្ងៃហើយក្នុងអំឡុងពេលនោះព្រះអង្គមិនបានបរិភោគអ្វីសោះ។ កាលរយៈពេលសែសិបថ្ងៃនោះបានចប់សព្វគ្រប់ហើយព្រះអង្គក៏ឃ្លាន 3នោះអារក្សសាតាំងទូលព្រះអង្គថា៖ «បើអ្នកជាព្រះរាជបុត្រារបស់ព្រះជាម្ចាស់មែនចូរបង្គាប់ឲ្យថ្មនេះក្លាយជានំប៉័ងទៅ» 4ប៉ុន្ដែព្រះយេស៊ូមានបន្ទូលឆ្លើយទៅវាថា៖ «មានសេចក្ដីចែងទុកមកថាមនុស្សមិនរស់ដោយសារតែនំប៉័ងប៉ុណ្ណោះទេ» 5អារក្សសាតាំងក៏នាំព្រះអង្គទៅហើយបង្ហាញឲ្យព្រះអង្គឃើញនគរទាំងអស់នៅក្នុងពិភពលោកក្នុងមួយរយៈពេលដ៏ខ្លី 6ហើយអារក្សសាតាំងទូលព្រះអង្គថា៖ «ខ្ញុំនឹងឲ្យសិទ្ធិអំណាចព្រមទាំងសិរីរុងរឿងនៃនគរទាំងអស់នោះដល់អ្នកដ្បិតទាំងអស់នោះត្រូវបានប្រគល់មកឲ្យខ្ញុំហើយខ្ញុំចង់ឲ្យទៅអ្នកណាក៏បាន 7ដូច្នេះប្រសិនបើអ្នកថ្វាយបង្គំខ្ញុំនោះអ្វីៗទាំងអស់នឹងក្លាយជារបស់អ្នកហើយ»។ 8ព្រះយេស៊ូមានបន្ទូលឆ្លើយទៅវាថា៖ «មានសេចក្ដីចែងទុកមកថាអ្នកត្រូវថ្វាយបង្គំព្រះអម្ចាស់ជាព្រះរបស់អ្នកហើយត្រូវបម្រើព្រះអង្គតែមួយប៉ុណ្ណោះ» 9អារក្សសាតាំងក៏នាំព្រះអង្គទៅក្រុងយេរូសាឡិមរួចដាក់ព្រះអង្គនៅលើកំពូលព្រះវិហារហើយទូលព្រះអង្គថា៖ «បើអ្នកជាព្រះរាជបុត្រារបស់ព្រះជាម្ចាស់មែនចូរទម្លាក់ខ្លួនទៅក្រោមទៅ 10ដ្បិតមានសេចក្ដីចែងទុកមកថាព្រះអង្គនឹងបង្គាប់ទេវតារបស់ព្រះអង្គពីដំណើរអ្នកដើម្បីការពារអ្នក 11ហើយទេវតានឹងទ្រអ្នកនៅលើដៃក្រែងលោជើងអ្នកទង្គិចនឹងថ្ម»។ 12ព្រះយេស៊ូមានបន្ទូលឆ្លើយទៅវាថា៖ «មានសេចក្ដីចែងទុកមកទៀតថាកុំល្បួងព្រះអម្ចាស់ជាព្រះរបស់អ្នកឡើយ»។ 13កាលអារក្សសាតាំងបានបញ្ចប់សេចក្ដីល្បួងទាំងអស់សព្វគ្រប់ហើយវាក៏ចាកចេញពីព្រះអង្គទៅលុះត្រាតែមានឱកាសទៀត។ការងាររបស់ព្រះយេស៊ូនៅស្រុកកាលីឡេ
14ព្រះយេស៊ូយាងត្រលប់ទៅស្រុកកាលីឡេវិញប្រកបដោយអំណាចរបស់ព្រះវិញ្ញាណហើយដំណឹងអំពីព្រះអង្គបានឮសុសសាយដល់ស្រុកទាំងអស់នៅជុំវិញ។ 15ព្រះអង្គបានបង្រៀននៅក្នុងសាលាប្រជុំរបស់ពួកគេទាំងទទួលបានការសរសើរតម្កើងពីពួកគេទាំងអស់គ្នា។ការបដិសេធព្រះយេស៊ូនៅក្រុងណាសារ៉ែត
16បន្ទាប់មកព្រះអង្គបានយាងទៅក្រុងណាសារ៉ែតជាកន្លែងដែលព្រះអង្គបានចម្រើនវ័យឡើងព្រះអង្គបានចូលទៅក្នុងសាលាប្រជុំនៅថ្ងៃសប្ប័ទតាមទម្លាប់របស់ព្រះអង្គព្រមទាំងបានក្រោកអានបទគម្ពីរ 17ហើយគេបានយកអត្ថបទគម្ពីររបស់លោកអេសាយដែលជាអ្នកនាំព្រះបន្ទូលមកប្រគល់ជូនព្រះអង្គ។ កាលបានលាអត្ថបទហើយព្រះអង្គរកឃើញកន្លែងមួយដែលចែងថា៖ 18«ព្រះវិញ្ញាណរបស់ព្រះអម្ចាស់បានសណ្ឋិតលើខ្ញុំពីព្រោះព្រះអង្គបានចាក់ប្រេងតាំងដល់ខ្ញុំដើម្បីប្រកាសដំណឹងល្អដល់ពួកអ្នកក្រគឺព្រះអង្គបានចាត់ខ្ញុំឲ្យមកប្រកាសអំពីការដោះលែងដល់ពួកអ្នកជាប់ជាឈ្លើយនិងអំពីការប្រោសឲ្យភ្លឺដល់ពួកមនុស្សខ្វាក់ហើយឲ្យរំដោះអស់អ្នកដែលត្រូវគេសង្កត់សង្កិនឲ្យមានសេរីភាព 19ព្រមទាំងប្រកាសពីឆ្នាំនៃសេចក្ដីមេត្ដារបស់ព្រះអម្ចាស់» 20ហើយព្រះអង្គក៏មូរអត្ថបទគម្ពីរប្រគល់ទៅឲ្យអ្នកថែរក្សាវិញនោះភ្នែករបស់មនុស្សទាំងអស់ក្នុងសាលាប្រជុំបានសម្លឹងមើលព្រះអង្គគ្រប់ៗគ្នា។ 21ព្រះអង្គក៏ចាប់ផ្ដើមមានបន្ទូលទៅពួកគេថា៖ «ថ្ងៃនេះបទគម្ពីរដែលអ្នករាល់គ្នាបានឮនៅនឹងត្រចៀកបានសម្រេចហើយ»។ 22ពួកគេគ្រប់គ្នាបានសរសើរព្រះអង្គនិងនឹកអស្ចារ្យពីព្រះបន្ទូលប្រកបដោយព្រះគុណដែលបានចេញពីព្រះឱស្ឋរបស់ព្រះអង្គមកប៉ុន្ដែពួកគេនិយាយគ្នាថា៖ «តើអ្នកនេះមិនមែនជាកូនរបស់យ៉ូសែបទេឬ?» 23ព្រះអង្គក៏មានបន្ទូលទៅពួកគេថា៖ «អ្នករាល់គ្នាមុខជានិយាយសុភាសិតនេះប្រាប់ខ្ញុំមិនខានថាគ្រូពេទ្យអើយ! ចូរព្យាបាលខ្លួនឯងចុះអ្វីៗដែលយើងឮថាបានកើតឡើងនៅក្រុងកាពើណិមនោះចូរធ្វើនៅទីនេះជាស្រុករបស់ខ្លួនអ្នកដែរ»។ 24ព្រះអង្គមានបន្ទូលទៀតថា៖ «ខ្ញុំប្រាប់អ្នករាល់គ្នាជាប្រាកដថាអ្នកនាំព្រះបន្ទូលមិនបានទទួលការស្វាគមន៍នៅក្នុងស្រុកកំណើតរបស់ខ្លួនទេ 25ប៉ុន្ដែខ្ញុំប្រាប់អ្នករាល់គ្នាពីសេចក្ដីពិតថានៅជំនាន់លោកអេលីយ៉ាមានស្ដ្រីមេម៉ាយជាច្រើននៅក្នុងអ៊ីស្រាអែលកាលនោះមេឃរាំងបីឆ្នាំប្រាំមួយខែបណ្ដាលឲ្យមានគ្រោះអត់ឃ្លានជាខ្លាំងនៅលើទឹកដីទាំងមូល 26ប៉ុន្ដែព្រះជាម្ចាស់មិនបានចាត់លោកអេលីយ៉ាឲ្យទៅឯអ្នកណាម្នាក់ក្នុងចំណោមស្ដ្រីមេម៉ាយទាំងនោះទេគឺព្រះអង្គបានចាត់លោកឲ្យទៅឯស្ដ្រីមេម៉ាយម្នាក់នៅក្រុងសារិបតានៃស្រុកស៊ីដូនវិញ។ 27ហើយនៅជំនាន់លោកអេលីសេជាអ្នកនាំព្រះបន្ទូលមានមនុស្សឃ្លង់ជាច្រើននៅក្នុងអ៊ីស្រាអែលប៉ុន្ដែក្នុងចំណោមពួកគេគ្មានអ្នកណាម្នាក់ត្រូវបានប្រោសឲ្យជាស្អាតទេគឺមានតែលោកណាម៉ានជាជនជាតិស៊ីរីម្នាក់ប៉ុណ្ណោះ»។ 28កាលមនុស្សទាំងអស់ក្នុងសាលាប្រជុំបានឮសេចក្ដីទាំងនេះក៏ពោរពេញដោយកំហឹងយ៉ាងខ្លាំង 29ហើយពួកគេបានក្រោកឡើងបណ្ដេញព្រះអង្គចេញទៅក្រៅក្រុងដែលពួកគេបានសង់នៅលើភ្នំរួចនាំព្រះអង្គឡើងទៅចម្រេះភ្នំនោះដើម្បីច្រានព្រះអង្គទម្លាក់ចុះ។ 30តែព្រះអង្គបានយាងកាត់កណ្ដាលចំណោមពួកគេចេញទៅ។ព្រះយេស៊ូបណ្ដេញអារក្ស
31ព្រះអង្គបានយាងចុះទៅក្រុងកាពើណិមជាក្រុងមួយនៃស្រុកកាលីឡេហើយក៏បង្រៀននៅថ្ងៃសប្ប័ទ។ 32ពួកអ្នកស្ដាប់នឹកអស្ចារ្យក្នុងចិត្ដចំពោះសេចក្ដីបង្រៀនរបស់ព្រះអង្គព្រោះព្រះបន្ទូលព្រះអង្គប្រកបដោយសិទ្ធិអំណាច។ 33នៅក្នុងសាលាប្រជុំមានបុរសម្នាក់ដែលមានវិញ្ញាណអាក្រក់របស់អារក្សចូលគាត់បានស្រែកដោយសំឡេងខ្លាំងៗថា៖ 34«ព្រះយេស៊ូអ្នកក្រុងណាសារ៉ែតអើយតើយើងនិងព្រះអង្គមានរឿងហេតុអ្វីនឹងគ្នា? តើព្រះអង្គមកបំផ្លាញយើងឬ? ខ្ញុំស្គាល់ហើយព្រះអង្គជាអង្គបរិសុទ្ធនៃព្រះជាម្ចាស់»។ 35ព្រះយេស៊ូបន្ទោសវាថា៖ «ស្ងៀមហើយចេញពីបុរសនេះទៅ!» កាលអារក្សផ្ដួលបុរសនោះទៅកណ្ដាលចំណោមហើយវាក៏ចេញពីគាត់ដោយមិនបានធ្វើឲ្យគាត់ឈឺចាប់ឡើយ។ 36ពួកគេគ្រប់គ្នាមានសេចក្ដីកោតស្ញប់ស្ញែងក៏និយាយគ្នាថា៖ «តើពាក្យសំដីនេះជាអ្វីបានជាលោកបញ្ជាពួកវិញ្ញាណអាក្រក់ដោយសិទ្ធិអំណាចនិងឫទ្ធានុភាពហើយពួកវាក៏ចេញមកដូច្នេះ?» 37ដំណឹងអំពីព្រះអង្គលេចឮគ្រប់ទីកន្លែងនៅស្រុកជុំវិញ។ព្រះយេស៊ូប្រោសមនុស្សជាច្រើននៅក្រុងកាពើណិម
38កាលបានក្រោកឡើងចេញពីសាលាប្រជុំព្រះអង្គក៏ចូលទៅក្នុងផ្ទះរបស់លោកស៊ីម៉ូន។ ម្ដាយក្មេករបស់លោកស៊ីម៉ូនកំពុងមានជំងឺគ្រុនជាខ្លាំងពួកគេក៏អង្វរព្រះអង្គឲ្យប្រោសគាត់។ 39ព្រះអង្គក៏ឈរជិតគាត់ស្ដីបន្ទោសដល់ជំងឺគ្រុននោះជំងឺគ្រុនក៏បាត់ទៅហើយភ្លាមនោះគាត់ក្រោកឡើងបម្រើពួកគេ។ 40នៅពេលថ្ងៃលិចអស់អ្នកដែលមានបងប្អូនមានជំងឺរោគាផ្សេងៗបាននាំពួកអ្នកជំងឺទាំងនោះមកឯព្រះអង្គហើយព្រះអង្គបានប្រោសពួកអ្នកជំងឺឲ្យជាសះស្បើយដោយដាក់ព្រះហស្ដលើពួកគេម្នាក់ម្ដងៗ។ 41ពួកអារក្សបានចេញពីមនុស្សជាច្រើនទាំងស្រែកថា៖ «ព្រះអង្គជាព្រះរាជបុត្រារបស់ព្រះជាម្ចាស់» ប៉ុន្ដែព្រះអង្គបានស្ដីបន្ទោសពួកវាមិនអនុញ្ញាតឲ្យពួកវានិយាយទេពីព្រោះពួកវាស្គាល់ថាព្រះអង្គជាព្រះគ្រិស្ដ។ព្រះយេស៊ូប្រកាសនៅក្នុងស្រុកកាលីឡេ
42លុះព្រឹកឡើងព្រះអង្គក៏ចេញទៅកន្លែងស្ងាត់មួយហើយបណ្ដាជនបានតាមរកព្រះអង្គកាលពួកគេបានមកជួបព្រះអង្គហើយក៏ឃាត់ព្រះអង្គមិនឲ្យចាកចេញពីពួកគេ។ 43ព្រះអង្គក៏មានបន្ទូលទៅពួកគេថា៖ «ជាការចាំបាច់ណាស់សម្រាប់ខ្ញុំដែលត្រូវប្រកាសដំណឹងល្អអំពីនគរព្រះជាម្ចាស់ដល់ក្រុងដទៃទៀតដែរដ្បិតព្រះជាម្ចាស់បានចាត់ឲ្យខ្ញុំមកដើម្បីការនេះឯង» 44ព្រះអង្គក៏ប្រកាសនៅក្នុងសាលាប្រជុំនានារបស់ជនជាតិយូដា។
Copyright information for
KhmKCB